O servizo de socorrismo de Sanxenxo adiantarase ao 15 de xuño en seis praias do municipio durante o próximo verán. Así consta no prego do contrato que a empresa coruñesa Salvar, Formar y Socorrer S.L. aceptou dentro da fórmula de externalización deste traballo pola que aposta o goberno local de Sanxenxo.
As praias nas que se establecerá este servizo para mediados de xuño serán Areas, Silgar, Canelas e Montalvo, ademais doutras dúas que aínda están por determinar polo Concello. A esta decisión súmase que Silgar contará cun horario máis ampliado de socorristas durante os meses de xullo e agosto. Comezarán ás 11.30 e finalizarán ás 20.30 horas. En 2021, as quendas iniciábanse ás 12.00 e concluían ás 20.00 horas.
A oferta económica da empresa adxudicataria é lixeiramente inferior ao prezo de licitación. A cifra ascende a 1.329.833 euros por un período de dous anos (2022 e 2023). O contrato contempla a opción de prorrogarse dous anos máis.
A empresa contratará a 46 socorristas para atender os 17 areais con bandeira azul de Sanxenxo. Ademais das embarcacións e motos náuticas habituais dos últimos veráns no servizo, neste verán engadirase unha moto para inspección, supervisión e control das praias. Tamén se incorporará un vehículo de intervención para o traslado de persoal en caso de emerxencia.
A dotación, por módulo, contará co seguinte material: un desfibrilador, un equipo de férulas semirríxidas, balón ou botella de osíxeno medicinal, mochila de primeiros auxilios, balón autoinflable ou ventilador manual, máscaras de baixo e alto fluxo, colarín cervical, tensiómetro, termómetro, mantas térmicas e diferentes apósitos para curas ou golpes, segundo informa o Concello de Sanxenxo. Inclúese tamén unha cadeira anfibia para o baño de persoas con problemas de mobilidade e muletas anfibias para as praias de Panadeira, Silgar, Baltar, Caneliñas e Canelas.
A adxudicataria tamén realizará campañas de concienciación e coidado de espazos naturais, tal e como recolle a primeira ordenanza de praias do municipio.