Nestas festas do Nadal de 2015, Pontevedra contará con dúas cabalgatas de Reis. Ademais da tradicional, os traballadores de Elnosa decidiron levar a cabo unha cabalgata reivindicativa que se desenvolverá o luns 4 ás 18.00 horas polas rúas de Pontevedra.
Os representantes do comité de empresa a través do presidente, Avelino García, e o secretario comarcal de Comisións Obreiras, José Luis García Pedrosa, anunciaron este acto que ten como obxectivo seguir reclamando a continuidade da electroquímica na súa actual localización en Lourizán. Avelino García explicou que participarán familiares dos traballadores nesta iniciativa e que os tres reis da cabalgata serán "Malos". Desta forma, lucirán as caretas do alcalde Miguel Anxo Fernández Lores e dos concelleiros Carme da Silva e César Mosquera.
A caravana comezará na avenida de Vigo e circulará por Fernández Ladreda, Manuel do Palacio, Corbaceiras e a Alameda. Alí, as "malignas maxestades" coa súa comitiva percorrerán a pé o último tramo ata a praza da Peregrina. Xunto aos Reis, un grupo de gaitas amenizará o desfile e levarán unha góndola como carroza ademais de cabezas tractoras desde as que se repartirán máis de 100 quilos de caramelos.
Con este acto, os traballadores queren reflectir o temor sobre o seu futuro e o das súas familias se desde o goberno local continúa impulsándose a marcha de Elnosa. Avelino García insistiu en que van facer todo o posible para que este conflito se solucione e concluíu "se Ence queda, nós tamén".
O presidente do comité indicou que a finais de novembro, o máximo accionista da empresa, José de Mello, visitou as instalacións para manifestar que a partir de 2016 queren trasladar aos cidadáns e aos medios de comunicación o seu proxecto de futuro en Lourizán.
José Luis García Pedrosa criticou a actitude do goberno de Fernández Lores por manter un discurso de hai "30 anos" e engadiu que non hai razóns ambientais para que a empresa teña que deixar a súa actual localización. Sinalou que "isto non é Tafisa" e que se organizarán as mobilizacións necesarias para manter os postos de traballo.