As obras de humanización da Rúa Unión de Sanxenxo, xunto cos seus viais adxacentes, entraron xa na súa recta final.
O groso dos traballos tanto de canalizacións como de superficies xa están concluídos.
A pedra empregada en superficies como prazas e escaleiras para substituír ao formigón e as baldosas propiciou, segundo o Concello, unha mellora estética e de accesibilidade craves na recuperación dunha contorna en mal estado de conservación e mantemento.
Para concluír a obra tan só restaría o axardinamento, o mobiliario e a iluminación.
En concreto, colocaranse luminarias tipo LED de aluminio coas que se logrará unha maior eficiencia enerxética.
Así mesmo, haberá macetas de diferentes cores que permitirán un axardinamento da zona con variadas especies e plantas que axudarán a mellorar a imaxe desta céntrica contorna.
A actuación, que custou uns 287.000 euros, é financiada a través do Plan Concellos da Deputación de Pontevedra.