Numerosas sentenzas xudiciais ditaminaron que a retirada da paga extra de Nadal aos funcionarios públicos, ordenada polo Goberno en 2012, non debería ter tido efectos retroactivos. ÿ dicir, só se debía retirar a parte proporcional dende o día no que se entrou en vigor o devandito decreto, o 15 de xullo, e non todo o complemento dende o 1 de xuño como finalmente se executou.
O Concello de Pontevedra, ao igual que a Deputación provincial, non foi alleo a estas sentenzas. O pasado mes de marzo o Xulgado do Social número 4 de Pontevedra ordenaba a devolución das cantidades que o seu persoal laboral debería ter cobrado entre o 1 de xuño e o 14 de xullo. E o goberno municipal decidiu aboar ese diñeiro e ampliar os seus efectos a todos os traballadores públicos, para evitar múltiples reclamacións.
Cúmprese así o acordo que se alcanzou cos sindicatos o pasado 30 de maio. A cantidade que debe pagar o Concello supera os 100.000 euros e será aboada coa nómina deste mes, salvo nos casos do Instituto Municipal de Deportes e o Pazo da Cultura que, como organismos autónomos, deben seguir un procedemento paralelo e cuxos traballadores cobrarán en próximos meses.
Segundo explicou o concelleiro de Personal, Vicente García Legísima, o goberno municipal cumpre así cunha cuestión sobre a que hai sentenzas xudiciais "mesmo do Supremo" e sobre a que se pronunciou tamén a Valedora do pobo, Soidade Becerril, instando ás administracións públicas a devolución deste diñeiro aos seus empregados.