A Festa do Carneiro ao Espeto de Moraña prepárase para unha nova edición cun amplo programa de actividades que se desenvolverán durante todo o mes de xullo, culminando o domingo 27 coa tradicional comida de carneiro asado e a actuación da orquestra Panorama, que porá o punto final a esta celebración declarada de interese turístico.
O programa comeza este sábado 5 de xullo coa II Exposición de Cans de Caza e Concursos Monográficos na Carballeira de Santa Xusta, que acollerá exhibicións de diversas razas como Beagle, Sabueso Español e Gascón Saintongeois, entre outras.
Ese mesmo día, a partir das 16:00 horas, celebrarase unha festa infantil con colchonetas gratuítas para os máis pequenos, organizada pola Asociación Amigos do Acibal.
O domingo 6 continuarán as actividades coa IV BTT Carneiro ao Espeto e unha andaina popular, dúas iniciativas con saída na chaira do Multiusos ás 09:00 horas, percorrendo varias parroquias do concello.
A programación gastronómica comezará o venres 11 de xullo ás 21:00 horas coa degustación "Espétalle un pincho", na Carballeira de Santa Lucía, onde os asistentes poderán probar distintas elaboracións de carneiro preparadas polos bares e restaurantes de Moraña e o chef Miguel Mosteiro.
O evento estará amenizado polo monologuista morañés e humorista da TVG, Tino Barros, e a actuación de Pablo Balseiro e os Cascariñas.
O sábado 12 de xullo a Carballeira de Santa Lucía acollerá unha feira de artesanía e segunda man, unha exposición de bonsáis no Multiusos, unha sesión vermú con actuación musical ás 12:30 horas, un desfile de moda ás 19:00 horas e unha degustación gratuíta de paella ás 21:00 horas.
Ese mesmo día celebrarase a I Busca do Tesouro Clásicos do Carneiro, unha concentración de vehículos de máis de 30 anos, e un certame coral no Edificio Multiusos ás 20:30 horas.
O venres 18 de xullo, o Multiusos acollerá o show de comedia "Aló imos" ás 21:30 horas, protagonizado polo veciño Tino Barros e Juan Meniño, dous cómicos saídos do programa da TVG "O novo Rei da Comedia".
O domingo 20 celebrarase a XI Carreira Carneiro ao Espeto ás 10:30 horas e as finais do Torneo Interparroquial de Fútbol a partir das 17:00 horas.
Durante a semana previa á gran festa final, terán lugar diversas actividades como o espectáculo teatral "O Rianxeiro. Ano Castelao" (día 21), un contacontos musical sobre cantareiras (día 22), unha festa acuática na piscina municipal (día 22), festa infantil e festa Holi para adolescentes (día 23), e o Carnaverán con actuación de DJ's (día 24).
O venres 25 de xullo, festivo en Galicia, organizarase unha ruta acuática en paddle surf polo río Umia ás 11:00 horas, a inauguración de dúas exposicións no Multiusos (unha de mulleres rurais e outra de pintura) e o concerto "Unha noite de amor con Lela" a cargo da Banda de Música Nova Lira de Moraña ás 21:30 horas. A noite estará amenizada polas orquestras París de Noia e Charleston Big Band.
O sábado 26 celebrarase a Festa da Bicicleta ás 11:00 horas e unha verbena nocturna coas orquestras La Última Legión, Gran Parada e a discomóbil La Duendeneta.
O gran día da festa será o domingo 27 de xullo, que comezará ás 07:00 horas co prendido do lume de carballo para o asado dos carneiros.
A partir das 11:00 horas haberá animación de rúa coa charanga Os Encerellados, ás 14:00 horas realizarase a asignación de lotes e ás 14:30 horas terá lugar o extraordinario Xantar do Carneiro ao Espeto.
Xa pola noite, actuará o grupo De Vacas ás 20:00 horas e a festa rematará por todo o alto coas actuacións de O Son das Tabernas e da orquestra Panorama.
A Festa do Carneiro ao Espeto, que naceu na súa forma actual en 1969 por iniciativa dun grupo de mozos da localidade, está considerada unha das citas gastronómicas máis importantes de Galicia.
Nela ásanse ao estilo pampeiro, abertos en canal e con lume de leña, preto de douscentos carneiros, que se serven enteiros a grandes grupos previa reserva de mesa. Mentres esperan polo asado, que necesita unhas sete horas para estar a punto, os comensais abren o apetito coas empanadas e o viño do país, animando a xornada con charangas e ambiente festivo.