Cinco das orquestras máis recoñecidas do circuíto festivo nacional actuarán en Poio durante as Festas de San Xoán, que se celebrarán do 22 ao 27 de xuño.
Panorama, Los Satélites, Marbella, Kubo e Capitol subirán ao escenario da Seca durante todas as festas para celebrar verbenas de primeiro nivel.
A lectura do pregón, a cargo de Juan Mariño, director da Escola de Acordeóns de Campelo, o luns 22 marcará o inicio das festas. Ese mesmo día, volverase celebrar unha verbena no campiño do Mosteiro coa actuación do Grupo Azabache.
Trátase dunha tradición recuperada hai dous anos co obxectivo de poñer en valor os bailes populares que antigamente se organizaban neste emblemático espazo.
O martes 23, coincidindo coa noite de San Xoán, a verbena da Seca estará protagonizada por Los Satélites e, ao día seguinte, mércores 24, será a quenda da agrupación local Ritmo Xove e da orquestra Charleston.
O xoves 25 subirán ao escenario Panorama e Marbella, mentres que o venres 26 pecharán a programación das grandes verbenas Capitol e Kubo.
O concelleiro de Festexos, Fran Da Silva, adianta que nos vindeiros días se dará a coñecer a programación completa das festas.
"Queremos que Poio sexa un punto de encontro durante o San Xoán e que estas festas sexan un motivo de orgullo para todo o municipio", sostivo o edil.
As Festas de San Xoán ofrecerán seis días nos que tradición, música, deporte, gastronomía, cultura e lecer volverán compartir protagonismo.
Será cun cartel variado, con estilos e repertorios pensados para chegar a públicos de todas as idades, reforzar o gran ambiente festivo e converter San Xoán de Poio nun dos grandes referentes festivos do inicio do verán en Galicia.