A serie "A cociña gourmet en conserva", da man de Conservas Pescamar, ofrécenos unha receita ideal como aperitivo ou primeiro prato, coa que aproveitaremos todas as calidades do atún.
O atún claro é un peixe de sabor suave que destaca pola súa achega en proteínas de gran valor biolóxico e o seu alto contido en Omega-3.
O panqueique é unha torta plana, redonda, salgada ou doce, cuxa masa contén leite e está levedada, a diferenza da filloa ou a crepe, que non levaría fermento.
Para preparar uns deliciosos Panqueiques de atún Pescamar con recheo de salmón e queixo de cabra, necesitamos os seguintes ingredientes:
- 1 lata de Atún Claro en aceite de oliva Pescamar
- 1 cunca de fariña
- 1 culleradiña de fermento
- 1 cunca de leite
- 2 ovos
- sal
- aceite
- 200 g de salmón afumado
- 150 g de queixo cremoso de cabra
- follas de aneto
- follas de alfábega
Preparación:
Poñemos nun bol o leite cos ovos e mesturamos. Engadimos a fariña tamizada, o fermento e un chisco de sal. Batemos cunhas variñas ata que se integren todos os ingredientes.
Tapamos o recipiente e deixamos repousar a masa unha media hora para que empece a levedar.
Pasado este tempo, incorporamos á masa o contido da lata de Atún Claro en aceite de oliva Pescamar, previamente escorrido, e mesturamos.
Manchamos unha tixola ao lume cun pouco de aceite e, cando estea quente, vertemos unha parte da masa no centro, coa medida suficiente para cubrir toda a base. Douramos por ambos lados. Retiramos a un prato e deixamos arrefriar.
Procedemos da mesma maneira até acabar toda a masa.
Para presentar os panqueiques, untamos cada un co queixo cremoso de cabra e incorporamos parte do salmón tallado e unhas follas de aneto e alfábega. Enrolamos e empratamos.
En quince días, os produtos do mar serán de novo protagonistas dunha nova receita de "A cociña gourmet en conserva" de Conservas Pescamar.
