A Praza do Mar concentrará a actividade lúdica e festiva durante o Nadal en Sanxenxo cun 'Pazo de Nadal'.
O Concello confirmou a instalación neste enclave privilexiado dunha gran carpa de 2.100 metros cadrados que contará con mercado de Nadal, área de xogos, espazo gastronómico e zona para actuacións e actividades.
A carpa, explican, terá forma de iglú cun ancho mínimo de 30 metros e catro espazos diferenciados.
Este Pazo de Nadal está previsto que permaneza aberto desde o 5 de decembro até o 6 de xaneiro.
O aluguer da carpa e a súa colocación acaba de saír a licitación por 89.903 euros. Será, sinala o Concello, modular e totalmente desmontable cumprindo as normas e condicións de solidez e seguridade aplicables a este tipo de instalacións.
Neste proceso de licitación valorarase especialmente a estética de deseño da carpa no seu conxunto incluíndo o chan a base de tarima de madeira con moqueta antiescorregadiza e iluminación ambiente LED. Ademais, a adxudicataria deberá dispor de persoal técnico durante todo o período de funcionamento da carpa e as súas instalacións, capacitado para realizar labores de mantemento.
No que respecta á ambientación do Nadal no municipio, o Concello de Sanxenxo lembra que a iluminación do Nadal está en proceso de licitación para os dous próximos anos nun contrato por valor de 360.000 euros.
Está prevista a colocación de 345 motivos de alto valor estético repartidos en 84 espazos das sete parroquias.