Carlos Font, deputado provincial, manifestaba este martes o seu agradecemento ao Partido Popular por propoñer que a Deputación de Pontevedra se encargue de distribuír entre diferentes concellos da provincia máscaras para os menores, que a partir do próximo luns 27 de abril poderán saír das súas casas sempre en compañía dos seus familiares para realizar pequenas andainas.
Desta forma, a Deputación solicitou á Xunta de Galicia que, da forma máis inmediata posible, envíe á institución provincial 200.000 máscaras co compromiso de iniciar a súa repartición entre os municipios para que, á súa vez, repartan o material entre os menores de 14 anos.
Font apunta a que a Xunta non debería ofrecer problema nesta subministración ao recibir do goberno central case dous millóns de máscaras e indica que a administración autonómica é a que posúe o mando único para a repartición de material de protección.