Representantes da Unión Federal de Policía (UFP) mantiveron este luns unha reunión cos deputados nacionais do Partido Popular de Pontevedra, Pilar Rojo e Tomás Fole, na que analizaron a situación xeral deste colectivo na provincia á vez que lles presentaron unha serie de reivindicacións.
Nesta nova lexislatura e ante uns novos presupostos, os deputados populares consideran que é un "momento óptimo" para presentar unha serie de reivindicacións, nalgún caso históricas.
Entre as principais peticións que desde o sindicato esperan que os deputados nacionais trasladen ao Congreso estaría a creación de unha Unidade de Prevención e Reacción de Seguridade Cidadá (UPR) para Pontevedra, ou a falta de efectivos na provincia ao ser moi baixa a taxa de resposición dos policías que se xubilan.
Fíxose referencia tamén á necesidade de novas infraestruturas e dotación de material, imprescindible para o desenvolvemento da súa actividade (como por exemplo equipos de protección individual) e mellora en xeral das súas condicións de traballo.
Os deputados valoraron de forma moi positiva a reunión co sindicato e nos próximos días darán traslado de toda esta información para que "pouco a pouco poder solucionar todas estas necesidades que os representantes policiais reclaman".