O Concello de Poio inaugurou este martes os chamados 'bancos da paz' nos colexios de infantil e primaria do municipio. Fíxoo coincidindo coa conmemoración do Día da Paz e da Non Violencia.
O alcalde, Ángel Moldes, acompañado pola concelleira de Cultura e Educación, Natalia Sabarís, visitou o CEIP Espedregada, en Raxó, onde convidou ao alumnado a utilizar este banco "sempre que queiran, para solucionar conflitos, para compartir sentimentos, para escoitar ou para axudar".
"Son un lugar ao que recorrer cando calquera estudante busque paz e boa convivencia", subliñou Moldes.
Estes bancos, segundo o alcalde, non só promoven o diálogo, o respecto e o bo comportamento, senón que o propio alumnado participou na súa decoración e, ademais, impulsan a reciclaxe, posto que os cinco bancos colocados nos colexios están realizados con material reutilizado.
Ademais de inaugurar estes bancos da paz, o alumnado asistiu á lectura dun conto no que se lles anima a utilizar este recurso e recibiron unha pulseira da paz.