A partir desta semana, o Concello de Poio realizará unha serie de enquisas e entrevistas entre os hoteis, restaurantes e cafeterías para impulsar unha campaña de reciclaxe de envases de vidro nos establecementos de hostalería do municipio.
Deste xeito, intentarán coñecer que hábitos de reciclaxe de vidro teñen e cales son as súas necesidades, para así adecuar os recursos dispoñibles co obxectivo de seguir mellorando nas cifras de reciclaxe de vidro e facer de Poio un concello "máis ecolóxico e sostible".
Segundo os datos do municipio, a hostalería xera, aproximadamente, o 50% dos envases de vidro de un só uso, polo que desde a concellería de Obras e Servizos, Marcial García sinala que a súa colaboración "é clave para incrementar as cifras de recollida selectiva destes envases".
"Darase información, pero tamén queremos recibir a súa opinión e experiencia para ver en que podemos seguir mellorando. É imprescindible facer campañas específicas para informar e promocionar a reciclaxe no sector porque constitúe o primeiro xerador de residuos de vidro, pero tamén para darlles as ferramentas para poder facelo de xeito cómodo e eficaz", defende.
Para levar adiante esta iniciativa, que se realiza coa colaboración da entidade Ecovidrio, farán un traballo de campo con visitas personalizadas para reforzar tamén o coñecemento da normativa actual en materia de reciclaxe de envases de vidro e un equipo de educadores ambientais ocuparase de contactar cos locais para coñecer de primeira man cales son as súas necesidades.
O reciclaxe de envases de vidro é un elemento fundamental para contribuír ao desenvolvemento sostible xa que o vidro que se deposita nos contedores recíclase nun 100% e utilízase para fabricar novos envases, de forma indefinida e sen perder as propiedades orixinais. Polo que, de cada botella, tarro ou frasco que se recicle, poderase obter outro exactamente igual.
Engade Pontevedra Viva como fonte preferida de Google de balde
Mantente informado coas últimas noticias de actualidade.