O Concello de Poio reclama á Xunta a mellora da PO-308 tras rexistrase no ano pasado máis de 200 accidentes, segundo informou este luns a concelleira de Seguridade Cidadá, Marga Caldas, nunha comparecencia este luns en Combarro para analizar o alto índice de sinistros que rexistra este vial ao seu paso polo municipio.
A concelleira presentou un informe elaborado pola Policía Local, no que se constata que 2022 foi o peor ano en canto a número de accidentes, feridos e falecidos desde 2017.
A edil sinalou que destes máis de 200 accidentes de todo tipo, a meirande parte só provocaron danos materiais, e que rexistráronse 69 feridos de carácter leve, tres de gravidade e outros tres falecidos.
Sobre este último punto, Caldas puntualizou que dous destes falecementos tiveron lugar en tramos urbanos da vía de titularidade da Xunta de Galicia, na avenida de Andurique e en na de San Xoán.
O terceiro accidente mortal do 2022 tivo lugar no Covelo, na parroquia de Samieira, se ben aí as dilixencias foron responsabilidade da Garda Civil de Tráfico.
A concelleira de Seguridade Cidadá definiu como "alarmantes e moi preocupantes" estes datos, "que deixan claro que a PO-308 está lonxe de ser unha vía segura".
Para Marga Caldas as obras executadas pola Consellería de Infraestruturas no tramo da PO-308 ao seu paso por Poio son "insuficientes" e lamenta "a dobre vara de medir" da Xunta de Galicia xa que "nestes seis anos, mentres que en Sanxenxo a PO-308 xa está totalmente reformada ou executándose grandes actuacións" en Poio algúns dos puntos máis conflitivos como o centro de San Salvador, entre A Barca e A Porteliña, o núcleo de Combarro ou San Xoán "seguen a ser puntos negros polo elevado número de sinistros que se rexistran", recalcou a edil nacionalista.
Precisamente, a Avenida da Cruz e a Avenida da Costa, en Combarro, son dous dos lugares nos que a Policía Local constata un maior número de accidentes.
A XUNTA LAMENTA A "ESCASA COLABORACIÓN" DO CONCELLO
Horas despois da rolda de prensa, a Xunta de Galicia respondeu ás críticas emitidas por Marga Caldas e lamentou que a "única contribución" municipal á mellora da estrada PO-308 sexa "criticar e entorpecer" as actuacións que está a desenvolver a Xunta.
A este respecto, recordan que se están a executar nestes momentos obras para o fomento da mobilidade sostible no treito entre Fontenla e Combarro (1,7 millóns) ou que está xa rematado o itinerario entre O Covelo e Raxó ou a mellora ata A Granxa (4 millóns).
A estas obras sumarase un novo itinerario peonil e ciclista entre Combarro, Chancelas e Samieira, que está actualmente en tramitación.
Na execución destas actuacións, a Xunta denuncia a "escasa colaboración" por parte do Concello, "que non puxo a disposición os terreos necesarios para levar a cabo as intervencións e non plantexando colaboracións coa Xunta", como si fixo Sanxenxo no seu municipio.