Desde finais do mes de xuño empezáronse a repartir entre os veciños de Poio que así o solicitaron composteiros domésticos de 600 litros, que proceden do contrato asinado entre o Concello de Poio e a empresa concesionaria do servizo de recollida de basuras "Valoriza Servicios Medioambientales" .
Neste período xa se levan repartido máis de 150 composteiros domésticos, o que desde a Concellería de Medio Ambiente do Concello dirixida por Xosé Anxo Lodeiro se interpreta como que esta inicaitiva está a ter boa acollida entre os veciños do municipio, aínda que por descoñecemento moita da xente non participa nesta forma de reciclaxe.
Por este motivo durante esta semana se procedeu a dar novamente publicidade, mediante a colocación de carteis onde de forma esquemática se promove entre os veciños o uso dos composteiros domésticos cuxo fin é reciclar, reducir o volume de residuos que remata no contedor verde de forma sinxela e reutilizar estes residuos en forma de compost para abonar as hortas.
Desde o concello se aproveita para recordar aos veciños que así o soliciten que se seguirán entregando composteiros ata completar as 400 unidades.