A Policía Local de Sanxenxo celebrou este domingo un acto institucional con motivo do día da súa patroa, María Auxiliadora.
Os actos arrincaron cunha misa no Templo Novo e continuaron coa formación oficial dos axentes fronte ao Auditorio Emilia Pardo Bazán, onde posteriormente tivo lugar a cerimonia principal.
Durante a súa intervención, o alcalde, Telmo Martín puxo en valor o labor diario do corpo policial, ao que definiu como a imaxe da seguridade e a convivencia nas rúas do municipio.
Martín subliñou o reto que supón a forte variación poboacional que experimenta Sanxenxo, que pasa duns 18.000 residentes habituais a máis de 120.000 persoas en tempada alta. Neste contexto, destacou que só a dedicación, a profesionalidade e a capacidade de adaptación dos axentes permiten dar resposta a esa presión demográfica.
O alcalde tamén resaltou o esforzo organizativo que implica manter operativo o servizo policial durante as 24 horas do día, os 365 días do ano, unha circunstancia que cualificou como un exemplo do compromiso do Concello coa seguridade cidadá.
Martín defendeu que a seguridade do municipio é o resultado da coordinación constante entre a Policía Local e a Garda Civil, unha colaboración que, segundo sinalou, tradúcese en confianza tanto para os veciños como para quen elixen Sanxenxo como destino turístico.
Pola súa banda, o inspector principal xefe da Policía Local, José Manuel Duarte, agradeceu o respaldo institucional recibido e puxo o foco no traballo do conxunto do persoal. Tamén tivo palabras de recordo para os axentes xa xubilados, que foron igualmente homenaxeados durante o acto.
Un dos momentos máis destacados da cerimonia foi a entrega das Medallas ao Mérito Policial. Entre a recoñecidos figura Abelardo Martínez, coñecido como o "Poli Paco", distinguido polo seu labor de divulgación en educación viaria e a súa implicación en actividades formativas dirixidas a públicos de todas as idades, proxectando o nome de Sanxenxo a nivel nacional.
Tamén foron distinguidas a axente Sonia Romero, pola súa constancia, rigor e compromiso ao longo da súa carreira profesional, e Luisa Fariña, recoñecida pola súa capacidade de liderado e o seu papel decisivo en situacións especialmente complexas dentro do servizo.
O acto incluíu ademais felicitacións públicas a varios membros da Garda Civil do Posto Principal de Sanxenxo. Entre eles, o tenente David Marín, valorado por impulsar unha colaboración institucional máis próxima e operativa; a brigada Juan Manuel Fernández Touza, destacado polo seu compromiso e lealdade no traballo conxunto; e o garda Vicente Barreiro, recoñecido como peza crave na coordinación diaria entre ambos os corpos.
A cerimonia concluíu cun emotivo recoñecemento aos policías locais xubilados Manuel Ferreiro, Carlos Dacosta, Luís Marcial Rey, Faustino Balea, Celso García, José Juan Suárez, Manuel Fernández Torres e Juan Riveiro, que recibiron o aplauso dos asistentes en agradecemento a toda unha vida de servizo público.