As obras de ampliación do camiño do barrio do Val, na parroquia da Insua, permitirán acabar coas dificultades de acceso a unha zona do rural de Ponte Caldelas con alta densidade de poboación.
O goberno local decidiu afrontar unha actuación que considera moi necesaria, pero que entraña certa complexidade, pois obriga a instalar un muro de contención diante da pendente dos laterais. A vía, cuns 200 metros de lonxitude, vai pola parte superior da Casa do Pobo, e dá servizo a preto dunha ducia de vivendas.
Os traballos, cun orzamento duns 40.000 euros, comezaron hai algúns días e céntranse nestes intres nos movementos terras. A actuación permitirá triplicar o ancho dispoñible, pois algúns puntos pasarán de pouco máis de 2 metros a uns 6 metros. A colaboración veciñal foi crucial para facer posible esta obra, toda vez que tres propietarios cederon os terreos necesarios ao Concello.
A veciñanza comentou a súa satisfacción, pois na zona residen algunhas persoas de idade avanzada e xa houbo dificultades no pasado para o paso das ambulancias medicalizadas.
O Concello de Ponte Caldelas dá prioridade no seu plan de obras no rural á mellora dos accesos a vivendas nas que non é posible o paso de vehículos de emerxencias.