Ofrecer aos veciños unha maior seguridade para estar na "gran terraza" que, segundo o Concello, forman a Alameda e a Praza de España. É o que busca o goberno municipal de Ponte Caldelas coa súa decisión de pechar ao tráfico todo este ámbito.
A partir deste venres, a Praza de España será totalmente peonil todas as tardes de luns a venres e as fins de semana e festivos durante todo o día.
Esta medida, que se ía poñer en marcha unha vez executado o aparcamento central situado detrás da ludoteca, adiántase con motivo da COVID-19 e co obxectivo de permitir un maior distanciamento social entre a xente.
De luns a venres, poderase acceder á praza en coche en horario de 07.00 a 14.30 horas para facilitar a realización das xestións no casco urbano e para a entrada e saída de vehículos e autobuses aos centros escolares.
Os únicos que poderán permanecer na praza en horario de mañá e tarde son os taxistas.
A este respecto, o BNG vai un paso máis alá e pedirá no pleno municipal que esta peonalización da Praza de España sexa permanente.
Os nacionalistas entenden que as políticas de recuperación do espazo público deben ser unha "prioridade" para o goberno municipal que, a raíz da pandemia, "faise imprescindible".
Esta peonalización total da praza permitiría, segundo o BNG, adaptar ese espazo público para que sexa posible manter a distancia de seguridade sen que implique distanciamento social e sería necesaria unha reordenación do tráfico, para o que sería preciso que o treito da rúa Concepción Arenal entre o cruce e a rotonda do colexio pasara a ser de dobre sentido.