Unha nova asociación de pacientes nace en Pontevedra, reunindo en concreto a persoas que pasaron ou padecen afeccións cardíacas.
Bautizada como 'Ponte Corazón', é unha entidade impulsada pola Unidade de Rehabilitación Cardíaca do Complexo Hospitalario de Pontevedra (CHUP) e que deu os seus primeiros pasos coa aprobación dos seus estatutos e a elección dunha xunta directiva.
Ten como obxectivos, segundo os seus estatutos, promover accións de axuda mutua entre os enfermos de corazón, reforzar o apoio social necesario e colaborar coas institucións e organismos sanitarios para tentar mellorar a calidade de vida dos enfermos.
Ponte Corazón traballará ademais, sinalan, para lograr o desenvolvemento dun Programa de Rehabilitación Cardíaca con carácter xeral e gratuíto, así como dar a coñecer os seus beneficios entre os pacientes e os seus familiares.
Outras das súas líenas de acción serán a promoción e organización de sesións e campañas informativas en centros escolares, empresas ou asociacións interesadas sobre os factores de risco, e impulsar medidas dirixidas á prevención destas enfermidades.
Unha vez formalizada a inscrición desta organización sen ánimo de lucro no Rexistro de Asociacións de Galicia, dependente da Xunta, a entidade asociativa ten previsto pór en marcha unha campaña de captación de socios.
A súa xunta directiva provisional estará presidida por Pedro Baez Alfonsín, acompañado de Pedro Pérez, Jesús Manuel Drodríguez, José Luís Porto, Álvaro Valcarce Gómez e José Antonio Cuevas.
A Unidade de Rehabilitación Cardíaca do CHUP, dirixida polo cardiólogo Diego Fernández, púxose en marcha en 2021 e desde entón foron preto de 500 os pacientes que participaron das súas actividades.
Engade Pontevedra Viva como fonte preferida de Google de balde
Mantente informado coas últimas noticias de actualidade.