As cifras de afectados pola Covid cambian en cada balance na área Sanitaria en función de diferentes valores. Así, nunha última xornada na que se realizaron poucas probas PCR con respecto a outros días (330), en Pontevedra e O Salnés rexistráronse 44 contaxios, un número de infeccións que tendo en conta o maior volume de altas epidemiolóxicas supuxo un descenso de casos activos na maioría de municipios da comarca, segundo foron informando.
Só rompe esa tendencia Marín, que comparte perímetro con Pontevedra e Poio e que este sábado 2 de xaneiro contabiliza 46 casos activos de coronavirus, un máis que o venres.
Pola contra a capital provincial encabeza a baixada de infeccións activas ao contar con 137 afectados, 14 menos nas últimas 24 horas. No mesmo perímetro Poio conta con 45 casos (-3).
Tamén experimentan baixadas concellos como Bueu con 66 casos (-9), Vilagarcía de Arousa con 90 (-8) e Sanxenxo con 37 afectados (-6).
Pola súa banda noutro municipio da comarca como Vilanova de Arousa rózase a incidencia cero, xa que tras unha xornada sen novos contaxios entre os seus veciños atópase con 3 casos activos (-1).
O total de casos activos na área Sanitaria de Pontevedra e O Salnés é actualmente de 773, segundo o balance diario do Servizo Galego de Saúde.