Pontevedra amplía a súa rede de espazos naturais coa finalización da senda que conecta a Xunqueira da Gándara co parque forestal da Tomba, en Campañó.
O percorrido, de 1,8 quilómetros, foi visitado este martes polo alcalde, Miguel Anxo Fernández Lores, acompañado pola concelleira do rural, María José Abilleira, e a responsable de Turismo, Anabel Gulías.
O rexedor destacou que esta actuación forma parte dun proxecto "máis ambicioso" orientado a "poñer en valor todo o territorio periurbano de Pontevedra".
Este camiño enlaza a Xunqueira da Gándara, declarado Espazo Natural de Interese Local (ENIL) e en proceso de recuperación para o uso público, co parque forestal da Tomba, un espazo de 80 hectáreas acondicionado durante o pasado mandato en colaboración coa comunidade de montes.
Fernández Lores subliñou que a senda permitirá á cidadanía "saír da cidade, estar na xunqueira e logo pasar ata o parque da Tomba, que ten unhas vistas marabillosas sobre Pontevedra", á vez que a definiu como "unha alternativa máis para facer deporte e gozar do patrimonio natural que temos ao lado da cidade".
As obras desenvolvéronse nun prazo de dous meses e atópanse na súa fase final, coa instalación de ao redor de quince paneis informativos.
A actuación contou cun investimento de 158.000 euros, financiada a través dos fondos europeos NextGenerationEU dentro do Plan de Sustentabilidade Turística en Destino (PSTD).
