A repulsa da cidadanía pontevedresa cara aos atentados das últimas horas nas Ramblas de Barcelona e o frustrado en Cambrils (Tarragona) exteriorizouse este venres en forma de concentracións silenciosas.
Na capital, o Concello e a Deputación de Pontevedra uníronse para gardar cinco minutos de silencio ás portas do consistorio da rúa Michelena mentres que a Subdelegación optou por convocar outra ante a súa sede da praza de España. Ambas, e as rexistradas noutras localidades, condenaron de forma enérxica o ocorrido. "
"Queremos condenar enerxicamente este atentado, unha abosluta barbaridade e crueldade que non ten ningunha xustificación", sinalou o alcalde, Miguel Anxo Fernández Lores, que considera que "sesgar vidas humanas e deixar feridos graves non ten ningún sentido e é absolutamente condenable".
"Coa vía da violencia non se chega absolutamente a ningunha parte", engadiu Lores, que se mostrou partidario do diálogo e o raciocinio e, ademais, manifestou a solidariedade de Pontevedra con todos os familaires dos falecidos, cos feridos, co pobo catalán e coa cidade de Barcelona.
Lores é partidario de que "hai que responder a estes atentados coa máxima normalidade", pois "a vida debe continuar e a normalidade é a mellor forma de responder á anormalidade" e "non estar supetidados a atentados brutais e crueis e á sinrazón desta violencia". Esa normalidade pasa por manter o día a día e en Pontevedra non se suspenderá ningún acto festivo programado para a recta final das Festas da Peregrina.
CONCENTRACIÓN NA SUBDELEGACIÓN
Nas escalinatas da Subdelegación do Goberno tamén se desenvolveu unha concentración dun minuto de silencio ás 12.00 horas deste venres. A subdelegada Ana Ortiz manifestou a súa condena do atentado en Barcelona e mostrar as condolencias ás familias dos falecidos, aos feridos e, en xeral, á cidade de Barcelona. Sinalou que o presidente do Goberno Mariano Rajoy do mesmo xeito que a vicepresidenta Soraya Sáenz de Santamaría e o ministro de Interior, Juan Ignacio Zoido atópanse na zona para seguir a situación de maneira directa.
Ortiz, que estaba acompañada pola delegada da Zona Franca de Vigo, Teresa Pedrosa, felicitou a actuación dos Mossos d'Esquadra do mesmo xeito que a das forzas e corpos de seguridade do Estado. Destacou a rapidez e a súa determinación na intervención realizada mostrando a súa experiencia neste tipo de actos que "por desgraza" afectaron a España durante moitos anos. Engadiu que desde 2015 arrestáronse a máis de 200 persoas relacionadas co terrorismo yihadista e no que vai de ano a 11 persoas en Cataluña pola mesma causa.
En relación co mantemento dos concertos nas Festas da Peregrina, a subdelegada amparou ao Concello de Pontevedra afirmando que non podemos facer moito caso a estes terroristas e asasinos porque non poden conseguir que se paralice o país. Ana Ortiz concluíu que todos estamos nun estado de shock.
Similares imaxes vivíronse en municipos como Cuntis, Marín e Bueu, entre outros, ou ás portas de diversos centros de traballo en concentracións convocadas polos sindicatos UXT e CCOO. Na Comisaría provincial, a bandeira ondea a media hasta e o persoal gardou un minuto de silencio.