O goberno municipal de Pontevedra asume xa que "en principio" non haberá prórroga para poder conservar os 2,3 millóns de euros de fondos europeos que a Fundación Biodiversidade concedera para o 'destape' do Gafos.
Aínda que falta por chegar a confirmación definitiva, o edil de obras, César Mosquera, asume que se perderá esa subvención, polo menos na súa maior parte, ao non poder rematar a obra antes do prazo fixado, o 30 de xuño deste ano.
O Concello remitiu unha liquidación duns 300.000 euros, correspondentes á redacción do proxecto e os traballos previos realizados neste ámbito
Pero máis aló desa cantidade, a situación aboca a que o executivo pontevedrés teña que financiar este ambicioso proxecto, que custará 4,2 millóns, con fondos propios.
Aínda que Mosquera sostivo que existe unha "porta aberta" para alixeirar esta factura. Os ollos están postos no Ministerio para a Transición Ecolóxica.
E é que o goberno municipal negocia que sexa o departamento que dirixe a ministra Sara Aagesen o que asuma o financiamento desta actuación de renaturalización, unhas conversacións que estarían a avanzar de maneira satisfactoria.
A máis que probable perda de fondos europeos foi moi criticada desde o Partido Popular, que responsabilizan ao alcalde dunha "pésima xestión", ao modificar o proxecto anterior e fixar prazos que son "imposibles de cumprir".
"A perda de oportunidades económicas é unha pésima noticia para Pontevedra", denunciou Rafa Domínguez, que lamenta que o executivo municipal sexa "incapaz" de tramitar os seus proxectos "en tempo e forma".
A este respecto, César Mosquera reiterou que o Concello non renuncia aos fondos europeos adxudicados no seu día e sinalou que Pontevedra é un dos concellos que máis actuacións executou con estas axudas.
Contrapuxo este esforzo coa situación "radicalmente diferente" da Deputación de Pontevedra, xa que lembrou que a institución provincial renunciou "sen dar motivos" a case cinco millóns de euros para o Museo e para diversos plans de emprego.
Engade Pontevedra Viva como fonte preferida de Google de balde
Mantente informado coas últimas noticias de actualidade.