O estudo que realizou Booking, a principal plataforma de reservas hostaleiras, sinala que Pontevedra é o destino español máis buscado por viaxeiros de todo o mundo para 2024.
Supera así ás principais cidades do país, como Madrid e Barcelona, a destinos turísticos con alta demanda de estranxeiros como Magaluf e Castelldefels ou a localidades como Tenerife, Las Palmas de Gran Canaria, Murcia ou Cádiz.
Booking fala de "tendencias emerxentes" no turismo español por "novas inclinacións" que apuntan cara a un cambio nas preferencias dos turistas que buscan destinos máis frescos debido ás altas temperaturas nos seus lugares de orixe.
Neste sentido, Galicia destaca como "refuxio perfecto" pola súa variedade de aloxamentos, sobre todo pola presenza de hostais e pensións debido á gran cantidade de peregrinos que realizan o Camiño de Santiago.
Así mesmo, ofrece unha gastronomía "exquisita", aspecto "moi importante" para os españois, xa que seis de cada dez desexan coñecer a historia detrás dos pratos locais.
Tras coñecerse estes datos, o alcalde de Pontevedra, Miguel Anxo Fernández Lores destacou que Pontevedra "é atractiva por moitísimas cousas, pola xente, capacidade de acollemento, respecto ao medio ambiente, gastronomía..." e sostén que este ano, segundo comunicaron os hostaleiros, aumentaron as pernoitas e duración das pernoitas "utilizando Pontevedra como sede para coñecer o resto de Galicia".
O rexedor quixo felicitar a toda a xente que recibe aos turistas polo trato que dispensa aos visitantes logrando "que queiran volver".