A Comisión de Urbanismo do Concello de Pontevedra decidiu dar un paso adiante ante o que considera unha situación xa insostible para a veciñanza como son as obras de soterramento da liña de alta tensión entre Mourente e Ponte Sampaio.
Nun acordo adoptado por unanimidade, o órgano municipal acordou remitir unha queixa formal á empresa responsable dos traballos, UFD Distribución, así como á promotora, Unión Fenosa, esixindo que se acelere a finalización da intervención.
O proxecto, que ten como obxectivo mellorar a infraestrutura eléctrica mediante o soterramento da liña, leva meses en execución e está a deixar un regueiro de incomodidades no seu percorrido.
Segundo detallan desde o Concello, os traballos comezan na subestación de Mourente, situada na avenida de Lugo, nas inmediacións da rotonda de Montecelo, e continúan por varias vías urbanas: Virxinia Pereira, Lagares, Alcalde García Filgueira, Conde Bugallal e a estrada EP-002 ao seu paso pola parroquia de Tomeza.
Ao longo deste trazado, as obras están a xerar molestias constantes, que van desde dificultades na mobilidade ata afeccións no día a día da veciñanza e dos negocios da zona.
Unha situación que, segundo a comisión, "vai máis aló do aceptable" tendo en conta o tempo que levan prolongándose os traballos.
Por este motivo, o Concello decidiu formalizar a súa protesta e reclamar ás empresas implicadas non só que rematen canto antes, senón que o fagan garantindo unha "execución óptima e causando os menos perxuízos posibles".
O acordo unánime evidencia o malestar compartido polos distintos grupos políticos ante unha actuación que, aínda que necesaria, está a poñer a proba a paciencia dos residentes afectados.
Deste xeito, o goberno local de Pontevedra busca presionar a Unión Fenosa para que desbloquee esta obra e devolva a normalidade ás rúas afectadas o antes posible.