O concelleiro de Facenda, Raimundo González, presentou este xoves o avance da liquidación do presuposto municipal para 2014. As contas presentadas, que inicialmente ascendían a 66 millóns de euros, pecháronse en 78,75 millóns. Foi así tras as sucesivas modificacións de crédito que se foron aprobando ao longo do ano e que, segundo o goberno municipal, se destinaron principalmente a incrementar o capítulo de investimentos.
Neste sentido, os investimentos ascenderon aos 17 millóns de euros fronte aos 7 que figuraban no presuposto que se aprobou no seu momento.
Ademais, Raimundo González explicou que o grao de execución do presuposto se situou no 93,42% e que as contas botan un superávit de 2,36 millóns de euros. Este diñeiro, a falta de coñecer a liquidación definitiva, destinarase a amortizar parte da débeda ou a investimentos "financieiramente sostibles", é dicir, que non xeren gasto corrente.
O edil do BNG destacou que, con estes datos, o Concello de Pontevedra cumpre coa estabilidade presupostaria e o teito de gasto fixado por lei e, de cara ao 2015, non terá que realizar plan financeiro ningún.
Raimundo González afirmou que con este balance se demostra que Pontevedra ten uns "excelentes" parámetros económicos e financeiros, que este é un concello "saneado" e que se pode facer un presuposto "expansivo" aumentando o gasto social e os investimentos, ao tempo que se melloran os servizos que se prestan aos cidadáns.