A pandemia da covid-19 afectou de cheo a actividade de moitos sectores, un deles o dos furanchos. A maioría deles apenas puido traballar este ano, xa que estes establecementos teñen o permiso de apertura limitado entre o 31 de decembro e o 30 de xuño.
Iso agora vai a cambiar. O goberno municipal de Pontevedra modificará a ordenanza que regula os furanchos do municipio e autorizará que poidan abrir durante todo o mes de xullo se existen "circunstancias extraordinarias" que alteren a súa actividade.
Así llo explicou o concelleiro de Urbanismo, Xaquín Moreda, á Federación de Furancheiros, Loureiros e Viticultores de Pontevedra coa que mantivo unha xuntanza para analizar os cambios que se introducirán na normativa.
Para poder vender o excedente de viño da colleita propia, os propietarios dos furanchos solicitaran abrir a partir do 1 de decembro porque é un mes no que aínda ten bastante saída o viño ou ampliar o período de apertura ata o 31 de xullo.
O Concello desbotou a primeira opción porque decembro é un mes época do ano na que hostalería ten un importante movemento e os prexudicaría esta decisión, pero veu cos bos ollos a segunda proposta, sempre que existan circunstancias que o avalen.
A modificación da ordenanza incluirá, polo tanto, esa excepcionalidade á que se poderán acoller furanchos e loureiros para ampliar a súa apertura.