O Concello de Pontevedra presentou unha alegación ao plan da Xunta para construír 2.000 pisos protexidos nas zonas de San Amaro, O Marco e A Parda.
Un trámite que chega no último día do prazo, este martes 23 de decembro, e que, segundo o concelleiro de Infraestruturas, César Mosquera, busca corrixir "un pequeno matiz que podería ter consecuencias importantes a medio-longo prazo".
Nunha comparecencia ante os medios, Mosquera explicou que o proxecto de interese autonómico (PIA) redactouse nun clima de "moi boa relación" entre o Concello e a Consellería de Vivenda e Infraestruturas.
Con todo, nese proceso pasouse por alto un detalle que agora preocupa ao goberno local como é a falta de continuidade dun viario que condiciona o futuro desenvolvemento da antiga parcela de Fenosa, onde o Concello prevé situar a súa nova sede de emerxencias.
Ese complexo acollerá servizos como a Policía Local ou o guindastre municipal, polo que unha boa conexión viaria resulta fundamental.
Por iso é polo que a alegación municipal solicite a continuidade do viario previsto, co obxectivo de mellorar as comunicacións e non limitar a ordenación da parcela.
Mosquera insistiu na vontade de "máxima colaboración" coa Xunta e confiou en que a administración autonómica teña en conta esta petición, que considera esencial para evitar problemas futuros.
Engade Pontevedra Viva como fonte preferida de Google de balde
Mantente informado coas últimas noticias de actualidade.