Unha delegación do Concello de Pontevedra, co alcalde Miguel Anxo Fernández Lores á fronte, viaxará o xoves 10 de xullo a Tenerife para participar na rolda de prensa na que a organización dos Feroz anunciará a Gala de entrega de premios que volverá acoller a Boa Vila en xaneiro de 2026.
Será no marco do Festival "Lo que viene", organizado pola Asociación de Informadores Cinematográficos de España (AICE), responsable tamén dos Premios Feroz.
O Festival "Lo que viene" é un encontro entre prensa especializada e a industria audiovisual que se reune para coñecer o máis destacado da produción audiovisual española do segundo semestre do ano e analizar o momento do sector e para compartir co público algunha das estreas máis esperadas dos próximos meses, segundo explica a nota oficial da organización.
No marco deste encontro o alcalde ofrecerá unha rolda de prensa xunto a María Guerra, presidenta de AICE, adiantando algúns detalles da nova Gala dos Premios Feroz e aproveitará para convidar a todos os presentes a visitar a Boa Vila.
Esta cita "nos vai permitir falar de Pontevedra fóra de Pontevedra, polo mundo adiante", sinalou o alcalde.
Lores resaltou que este evento tivo "moito éxito" o pasado ano en Pontevedra "e esperamos que ou teña tamén este ano" sinalando que se trata de "unha actividade que nos interesa especialmente porque é en tempada baixa", no mes de xaneiro e no último trimestre deste ano 2025.
"Nesa rolda de prensa está previsto algunha que outra sorpresa", dixo ou alcalde.
Tamén anunciou Lores que o goberno local traballa para que, a partir de outubro, empece a programación paralela á Gala dos Premios Feroz con proxeccións de películas, pases de capítulos de series, encontros con artistas, directoras, produtores, guionistas, clases maxistrais, debates ou concertos entre outras actividades abertas ao público.
"O ano pasado foron unhas actividades moi seguidas pola ciudadanía de Pontevedra, e agardamos que nos sigan acompañando nesta proposta", concluíu o alcalde.