Pouca folga e numerosas concentracións en apoio a Palestina

Este mércores 15 de outubro é unha xornada de mobilizacións en solidariedade co pobo palestino, con paros laborais convocados polos principais sindicatos e manifestacións.

A Confederación Intersindical Galega (CIG) convocou un paro de catro horas - de 10:00 a 14:00 pola mañá e de 18:00 a 22:00 pola tarde - baixo o lema "Paremos o xenocidio".

Segundo Diana Rodríguez, secretaria comarcal do sindicato nacionalista, "o seguimento do paro está sendo bastante desigual", con empresas que rexistran entre un 25% e un 30% de participación, como Numarsi no polígono do Campiño ou os almacéns de Froiz.

Rodríguez denunciou que "os servizos mínimos da Xunta, como sempre, son abusivos e impiden o dereito á folga da maioría dos traballadores do sector público", especialmente en sanidade e administración pública.

Segundo puido comprobar PontevedraViva, a xornada de paro tivo escaso seguimento tanto nas administracións locais como nos negocios privados.

POSTURA DO GOBERNO LOCAL

Eva Vilaverde, tenente de alcalde de Pontevedra, participou na marcha da CIG ás 12.00 horas, na que tamén había representantes do sindicato CGT, que percorreu o centro da cidade desde a Ferrería ata a Praza da Peregrina.

"Dende o Concello de Pontevedra parecíanos importante seguir poñendo o foco sobre a situación que vive o pobo de Palestina, unha situación que sigue sendo de abuso que vai máis alá do suposto acordo do paro de bombardeos", declarou.

A concelleira sinalou que "existe un xenocidio que ten que ter un castigo por parte da comunidade internacional" e que o goberno municipal "tiña que estar presente nestas mobilizacións para visibilizar que seguen estando asoballados".

En relación á intervención de representación do Estado de Israel en futuros acontecementos deportivos na cidade, despois do acordo tomado en pleno rexeitando a súa participación, Vilaverde mantivo cautela: "É moi precipitado poder valorar algo así porque non sabemos exactamente como vai quedar a cousa. Iremos vendo como vai evolucionando e, en función diso, teremos que ir valorando de que maneira se posiciona o goberno municipal".

CIG

Pola súa banda, para a CIG, o problema non se limita aos bombardeos recentes, senón que ten as súas raíces nunha "brutal ocupación dende hai 77 anos por parte do Estado sionista de Israel". Rodríguez subliñou que "sen esta ocupación non se pode entender o xenocidio en Gaza", situando o conflicto actual nun contexto histórico máis amplo.

A secretaria comarcal destacou que esta mobilización non é puntual, senón que forma parte dunha campaña sostida no tempo: "Nós levamos dous anos mobilizándonos para que cese o xenocidio en Gaza, con máis de 1.100 mobilizacións en máis de 41 vilas e cidades do país". Esta persistencia responde ao principio de que "non podemos cesar na exixencia dos dereitos do pobo palestino".

Diana Rodríguez explicou que o paro pretende "denunciar o xenocidio que se está cometendo en Gaza e esixir a retirada das tropas israelís e o fin da ocupación do territorio". Ademais, busca "solicitar de inmediato que chegue dunha vez a axuda humanitaria, nomeadamente medicinas e alimentos" para paliar "esa situación de fame extrema que se está vivindo en Gaza".

Un dos aspectos centrais da posición da CIG é a esixencia de responsabilidades penais. Segundo Rodríguez, "o que se cometeu en Gaza non solamente foi un xenocidio, senón crimes de guerra", e considera fundamental que Netanyahu e o Estado sionista de Israel respondan polos crimes cometidos.

A CIG reclama tamén medidas concretas das administracións: "É imprescindible que por parte da Unión Europea, do Estado Español e da Xunta de Galicia se tomen medidas inmediatamente económicas e políticas contra Israel".

UGT

Pola súa banda, a UGT realizou unha concentración ás 11:15 horas na contorna da Praza da Ferrería, promovendo un paro de dúas horas. No seu comunicado, o sindicato esixiu "que o anunciado cesamento do fogo sexa permanente e verificable" e "a retirada das tropas israelís de todos os territorios palestinos".

Entre as demandas da UGT figuran a suspensión do Acordo de Asociación UE-Israel, medidas contra empresas que se lucran dos asentamentos ilegais e a prohibición do comercio de armas con Israel.

MÁIS MANIFESTACIÓNS

Para este mesmo mércores ás 20:00 horas está convocada unha manifestación que partirá da Praza da Peregrina, organizada pola Coordinadora Galega de Solidariedade con Palestina.

Simultaneamente celebrarase outra marcha que se iniciará na Praza de Galicia no Concello de Vilagarcía de Arousa.

O venres 17 de outubro, ás 19:00 horas, a Plataforma Parar a Guerra-Pontevedra convocou outra concentración na Peregrina. "Aínda que o momento que vivimos co acordo de Exipto pode ser un raio de esperanza, seguimos cunha profunda incerteza", sinalaron desde a plataforma.