O grupo municipal do Partido Popular de Pontevedra lamentou que o Concello siga coa "materia pendente" de optar ás bandeiras azuis nas praias fluviais do Lérez e na de Ponte Sampaio.
O PP lembra que no ano 2022 solicitaron ao goberno local o inicio dos estudos e traballos pertinentes para que estes areais cumpran os criterios esixidos para ter bandeiras azuis.
Este recoñecemento é outorgado por un organismo independente como é a Asociación de Educación Ambiental e do Consumidor (ADEAC).
Este verán lucirán bandeira azul 118 praias e 38 municipios de Galicia.
A concelleira do PP de Pontevedra Raquel Martínez sinalou que contar con bandeira azul garante aos cidadáns "unha excelente calidade da auga, unha contorna segura, accesible e sostible", ademais de "acreditar o compromiso do Concello co seu mantemento e conservación".
Raquel Martínez destaca que "non é unha cuestión estética, senón unha garantía para as familias que gozan destas zonas de baño".
O PP de Pontevedra defendeu que a praia fluvial do Lérez, en pleno corazón da cidade, e a de Ponte Sampaio, na desembocadura do Verdugo, son "dous enclaves naturais de enorme valor medioambiental" e por iso considera "incomprensible" que o goberno local do BNG siga sen dar os pasos necesarios para obter esta certificación.
A edil popular apunta que os requisitos para obter a bandeira azul son "sinxelos e asumibles", pois basta con acreditar a durante polo menos catro anos consecutivos a calidade da auga, dispor dunha axeitada xestión ambiental, recollida selectiva de residuos, servizo de socorrismo, accesibilidade universal e actividades de educación ambiental.
En definitiva, o PP de Pontevedra volve esixir ao goberno local que presente un plan concreto, con prazos realistas, para conseguir estas insignias nas súas praias.