A Xunta de Goberno do Concello de Poio aprobará o vindeiro martes a creación de dous novos aparcamentos en Anafáns, na parroquia de San Salvador, unha zona na que se demandan prazas ao existir numerosas vivendas unifamiliares, establecementos comerciais e un centro de saúde. A estas dúas parcelas accederase a través do Camiño da Ferreira e da Rúa Cabanas.
Tamén se creará unha terceira parcela de aparcamento na Rúa do Adro, no mesmo contorna, segundo indican desde o goberno de Ángel Moldes. A intención do Concello é que entren en funcionamento no tempo máis breve posible, atendendo ás condicións meteorolóxicas, que nos últimos días están a provocar un atraso na posta a punto.
O goberno local establece en preto de douscentos o número de prazas que se xerarán con estes tres novos aparcamentos disuasorios.
Durante este venres, Marcial García, concelleiro de Obras e Servizos, achegábase a comprobar o avance das obras na Rúa Cabanas que buscan unha mellora na accesibilidade ao centro de saúde desde a estrada de Campelo.
O goberno de Poio negociou coa veciñanza da zona o retranqueo dos muros para ampliar o espazo de paso, creando beirarrúas e garantindo unha maior seguridade peonil nunha vía con gran tránsito.