O Concello de Campo Lameiro recibirá preto de 30.000 euros para dotar o ximnasio municipal de novo material deportivo.
Esta axuda foi aprobada pola Deputación de Pontevedra ao abeiro do Plan Extraordinario de Infraestruturas Deportivas, dotado con 4 millóns de euros, dos cales 28.819 euros serán para equipar a instalación municipal situada no pavillón anexo ao CEIP Pedro Antonio Cerviño.
Desta maneira, adquirirán máquinas deportivas como bicicleta elíptica e estática, unha cinta de correr, barras de discos de diferentes pesos, pelotas saudables, bancos, colchonetas, discos olímpicos, bandas de resistencia, 'steps', agarres para poleas ou unha torre 4 estacións, entre outros elementos.
Este plan está dirixido aos 59 concellos da provincia de menos de 50.000 habitantes e mobilizou ata o momento máis de 2,4 dos 4 millóns de euros do orzamento total.