A fase final do proxecto no centro urbano que se acomete en Sanxenxo inclúe melloras na sinalización, accesibilidade e novas zonas axardinadas cun investimento superior a 300.000 euros
O proceso final da humanización e mellora das rúas Cesteiros, Viña da Fonte e Panadeira atópase na fase do pintado dos viarios, o que fixo necesario prohibir o estacionamento en ambas as marxes de Cesteiros e Viña da Fonte.
Nos próximos días, o Concello procederá ao traslado dos semáforos do cruzamento de Rúa Progreso, que se recolocarán xunto aos novos pasos de peóns e adaptarán o seu funcionamento.
O proxecto inclúe tamén a instalación de varandas na Rúa Progreso e na plraza da Rúa Viña da Fonte, co obxectivo de mellorar a seguridade dos peóns e protexer o desnivel entre a praza e a nova beirarrúa.
Ademais, a contorna verase beneficiada con novos bancos, papeleiras e a creación de dúas zonas axardinadas que contribuirán a embelecer e facer máis funcional este punto clave do municipio.
A intervención supuxo a renovación da iluminación, a sinalización e o sistema de drenaxe, así como a colocación de baldosa hidráulica sobre soleira de formigón nas beirarrúas.