Tarde de calor, pero con todo, media praza encheu de afeccionados. Peñistas e público de todas as idades, aínda que o maior número foi do público máis novo, participaron na becerrada celebrada no coso de San Roque.
A primeira parte da convocatoria tivo como protagonista á Banda de Música de Ribadumia, que ofreceu un repertorio con pezas da historia do pasodobre.
Seguidamente até catorce mozos de Pontevedra, da provincia e chegados igualmente doutros municipios galegos demostraron os seus dotes co capote e a muleta poñéndose diante dos becerros.
Durante varias fins de semana estes participantes estiveron a aprender e practicando toureo de salón, tutelados por un mestre que facilitou a Coordinadora de Peñas Taurinas de Pontevedra, en colaboración coa empresa Lozano.
A becerrada contou co destro salmantino Marco Pérez como director de lida, quen se desprazou até Pontevedra para participar no festexo.
O novísimo matador debutará o próximo agosto na Feira da Peregrina. Será no cartel do domingo 9 xunto a Talavante e Roca Rey.
Unha vez terminada a becerrada, Marco Pérez compartiu o seu tempo co público asistente que quixo fotografarse e conversar con el.
Un xesto que achega ás figuras que fan o paseíllo na feira pontevedresa coa súa afección.