Cumpridos os seus 27 anos de vida, camiño xa dos 28, a prisión da Lama encara unha "gran reforma" que solucionará algúns dos problemas asociados ao paso do tempo e o uso que xa empezaban a notarse nas instalacións.
Así o anunciou este mércores o subdelegado do Goberno en Pontevedra, Abel Losada, durante o acto oficial de conmemoración do Día da Mercé 2025 no centro.
Segundo indicou, o Goberno de España acaba de adxudicar as obras da gran reforma que "a prisión da Lama necesitaba" e que comezarán "en breve".
Son actuacións valoradas en case 7,5 millóns de euros para renovar as cubertas, cociñas e instalacións.
O centro penal dA Lama inaugurouse oficialmente o 26 de xuño de 1998 e o 7 de xullo dese ano empezou o traslado dos internos.
Desde entón, non foi obxecto de ningunha actuación desta dimensión.
Con este proxecto, "acabaranse algúns dos problemas que todo edificio vai arrastrando cando pasan os anos".
En palabras do subdelegado, "iso traducirase, sobre todo, nun mellor servizo público pago polos impostos de todos".