Protección Civil de Vilaboa amplía o seu radio de acción até Pazos de Borbén

A sgrupación de voluntarios de Protección Civil de Vilaboa prestará servizo tamén en Pazos de Borbén.

Ambos os dous concellos asinaron un convenio que transforma en permanente unha colaboración que até agora só activábase en situacións concretas e que pretende mellorar a capacidade de resposta ante emerxencias, especialmente durante os meses de verán polo alto risco de incendios forestais.

O convenio foi subscrito polo alcalde de Vilaboa, César Poza González, e o de Pazos de Borbén, Xosé Luciano Otero Camiña, co obxectivo de optimizar recursos, garantir uns servizos públicos de maior calidade e avanzar cara a unha xestión máis eficaz das emerxencias.

Até agora, a colaboración entre ambos os municipios producíase de maneira puntual, pero o novo acordo convértea nunha cooperación estable e planificada.

O alcalde de Vilaboa destacou que o convenio "permite consolidar un traballo que xa se viña facendo de forma espontánea", dotándoo agora dunha estrutura clara e unha coordinación permanente para reforzar a prevención e a seguridade da cidadanía.

Doutra banda, Xosé Luciano Otero quixo resaltar o bo entendemento entre ambos os municipios xa que "a colaboración con Vilaboa sempre foi exemplar" á vez que remarcou a estabilidade que brinda este convenio, "especialmente nun momento do ano no que os incendios son unha ameaza real".

Os detalles deste acordo recollen que cada concello sufragará os custos das intervencións realizadas no seu propio termo municipal para garantir unha xestión equilibrada e transparente dos recursos.

Doutra banda, o centro operativo manterase en Vilaboa e cada operación deberá contar coa autorización das respectivas alcaldías.

Ademais, o acordo contempla a creación dunha comisión mixta integrada por representantes de ambos os concellos para supervisar a xestión do servizo, fixar as directrices básicas e intervir en caso de discrepancias.

Así mesmo, o Concello de Vilaboa asumirá a tramitación das subvencións vinculadas ao servizo.

O convenio xa está en vigor desde a sinatura do mesmo e terá unha duración de catro anos, aínda que poderá resolverse por mutuo acordo, denuncia unilateral ou incumprimento das condicións establecidas.

Segundo ambos os gobernos municipais, este modelo de cooperación permitirá ofrecer unha protección civil máis sólida, coordinada e eficiente para a cidadanía.