Ao redor de cen persoas protagonizaban durante o mediodía deste sábado unha concentración na praza da Peregrina en defensa da sanidade pública. Esta convocatoria organizábana os sindicatos CGT, CAS, Prosagap e STEG coincidindo con outras sesenta localidades españolas.
Denuncian a situación de malas condicións laborais do persoal dos centros sanitarios pertencentes ao SERGAS, que terminan por crear o desánimo e a marcha dalgúns profesionais a outras áreas xeográficas.
Para que se resolva a actual situación piden que se derrogue a Lei 15/97 e o artigo 90 da Lei Xeral de Sanidade, ademais piden que non se desmantelen os centros sanitarios. Reclaman tamén que se supriman as redes paralelas e a compatibilidade público-privada.
Estas centrais sindicais esixen atención e coidados dignos para as persoas de avanzada idade e un sistema sanitario que se centre na prevención. Outro dos puntos centrais das súas reclamacións atópase na creación dun sistema farmacéutico publico e unha industria de investigación biosanitaria.