O parque de Campolongo será reformado durante 2017 para poder dar cobertura a un gran parque infantil de xogos, que atenda a demanda veciñal neste barrio da cidade. O concelleiro de Obras, Luís Bará, indicou que o goberno local é consciente de que na actualidade o Parque de Campolongo atópase "infradotado" en canto a equipamentos infantís xa que só conta co Parque do Cogomelo, pero os aparellos dese espazo son para nenos moi pequenos.
Tamén existen outros elementos destinados a que as persoas de avanzada idade realicen exercicios na praza da Constitución, fronte ás Piscinas. Luís Bará sinalou que eses aparellos non cumpren a súa función e están a ser utilizados polos escolares. Por ese motivo, o goberno local quere retiralos e deixar paso a un parque infantil de última xeración que se converta en "buque insignia" destes espazos en Pontevedra, que conten con xogos para persoas con discapacidade. Tampouco descartan substituír o estanque da praza da Constitución, que non satisfai ao goberno municipal.
A idea que manexan desde o Concello é que se poida realizar o proxecto ao longo de 2017 e poida estar finalizado en 2018.
Por outra banda, o concelleiro avanzou que tamén se incluirán xogos para persoas con discapacidade e van eliminarse algúns obstáculos entre os diferentes espazos no remodelado Parque de Barcelos.
O vindeiro luns, Bará reunirase cos veciños de Monte Porreiro para estudar as actuacións que van levar a cabo nos parques da urbanización ante os danos por vandalismo que se rexistraron. Tamén está previsto intervir no parque de Médico Ballina coa instalación de pistas polivalentes e xogos infantís.
Por últimos, no parque das Palmeiras acometerase nos próximos días unha mellora no estanque dos parrulos, que estaba a sufrir problemas de filtración, e no pombal. Ademais, darase un novo tratamento á zona situada fronte ao goberno militar porque as raíces das árbores levantaron as baldosas da beirarrúa.