Residentes da Rúa Os Olmos, no municipio de Cambados, manifestan o seu enfado polas condicións de salubridade e falta de mantemento nas que se atopa esta vía do municipio.
Segundo expoñen os residentes, a situación de abandono leva así desde hai anos, alcanzando niveis de acumulación de lixo que lles resultan insoportables durante o actual mes de xullo.
Os afectados detalla que os colectores de recollida selectiva e as papeleiras da rúa permanecen desbordados de residuos desde hai semanas, o que derivou no almacenamento de bolsas directamente sobre o asfalto.
A isto súmase a presenza de manchas de graxa incrustada nas beirarrúas, restos de cabichas e maleza que crece nos bordos debido á ausencia do servizo de limpeza viaria na zona.
No ámbito das infraestruturas, os veciños destacan a existencia dunha focha na calzada adxacente a un sumidoiro que se atopa obstruida pola acumulación de botellas, plásticos e vexetación, un factor que sinalan como risco de inundación ante posibles precipitacións.
A comunidade veciñal resalta que estes elementos se localizan nas inmediacións dun centro escolar e dun parque infantil.
A descomposición dos desperdicios orgánicos polas temperaturas estivais provocou a aparición de insectos, principalmente mosquitos, que acceden ao interior das vivendas lindeiras, limitando a ventilación dos inmobles.
Esta situación rexístrase en pleno conflito laboral do persoal da empresa Valoriza, concesionaria do servizo mancomunado de recollida de residuos en Cambados, Meis e Vilanova de Arousa. Os traballadores reclaman melloras salariais e ameazan coa convocatoria dunha folga.