Veciños de Pontevedra denuncian a presenza de verteduras no denominado Roteiro de 'Salcedo no tempo', un carreiro que habitualmente conta coa presenza de numerosas persoas que realizan actividades deportivas ou paseos por esta zona da parroquia de Salcedo, polo camiño que transcorre paralelo á vía ferroviaria.
Segundo denuncian, nas últimas semanas, persoas desaprensivas abandonan nesta zona entre O Muíño e Bértola diversos materiais voluminosos. Sinalan que non é estraño atoparse colchóns e mesmo sofás, pezas de cuartos de baño, restos de limpeza de hortas de cultivo e numerosos entullos procedentes de obras.
En ocasións, estes residuos son metidos en bolsas de plástico e lanzados á zona de transcurso da auga do río Gafos. Reclaman maior vixilancia por esta zona para que se detecte a autoría destas accións incívicas.