Tocan ventos de cambio nas Novas Xeracións da provincia de Pontevedra. Tras a saída de Ana Cristina Pérez Cabaleiro tras oito anos á súa fronte, a organización xuvenil do PP pontevedrés busca ao seu novo máximo responsable.
E un dos que deu un paso adiante foi Raúl Santamaría, deputado autonómico e concelleiro en Vilagarcía de Arousa.
El mesmo vén de anunciar a súa intención de optar á presidencia no congreso previsto para o próximo venres 12 de xuño. Terá que recoller un mínimo de 50 avais para presentarse.
"Levo toda a miña vida absolutamente comprometido coa mocidade", destacou o político vilagarcián, que aos seus 28 anos fíxose popular como un dos 'mozos de Arousa', os populares concursantes do programa Reacción en cadena.
O parlamentario galego, que xa está a deseñar o seu novo equipo por se finalmente acada a presidencia, considera que esta organización xuvenil "é a que máis que se parece á xuventude do país e é a que máis escoita e busca solucións para as súas necesidades".
A pesar diso, avogou por adaptar a organización "aos moitos cambios sociais que, no caso dos máis novos, son aínda máis grandes que para outros sectores da poboación".
Raúl Santamaría é licenciado en Educación Primaria e profesor e sempre tivo unha gran participación na vida pública.
Preside NNXX de Vilagarcía desde 2016, é concelleiro da capital arousá desde 2022 e deputado autonómico desde 2023.
Polo demais, sempre desenvolveu un gran compromiso coa xente máis nova a través do asociacionismo, a cooperación e a solidariedade, destacando o seu papel desde o colectivo Arousa Moza, que foi o que o levou á súa exitosa participación televisiva.