A sede da Cruz Vermella, na rúa Pai Gaite de Pontevedra, acollerá este martes, 13 de agosto, ás 12.00 horas, un recital de Alejandro Luaces.
Está previsto que acudan preto de 30 persoas que habitualmente asisten aos talleres para maiores na Organización.
O repertorio está composto por música popular e tradicional, que inclúe boleros, música melódica latinoamericana, música francófona, italiana, coplas, tangos e pasodobres; que evocarán os anos de mocidade das persoas maiores coas que se compartirá as súas cancións e emocións.
Segundo explican desde a Cruz Vermella, "este proxecto pon en valor o importante papel que desempeña a música á hora de crear espazos de relación e sociabilización entre as persoas maiores, así como para loitar contra a soidade non desexada".
Ademais, constitúese como unha "ferramenta clave" para a promoción do "envellecemento saudable", sendo unha canle de expresión máis para a voz dos maiores.
A atención de Cruz Vermella ás persoas maiores pretende ofrecer servizos que permitan a permanencia destas persoas na súa contorna habitual, evitando o illamento e dando acceso a actividades de promoción de hábitos saudables, estimulación cognitiva ou participación social para fomentar a confianza, a autonomía persoal e a integración, a través de talleres como, por exemplo, de memoria, manualidades, informática, baile ou charlas informativas, entre outras.
O Programa de Persoas Maiores de Cruz Vermella está financiado pola Xunta de Galicia a través dos fondos IRPF.