O Bloque Nacionalista Galego (BNG) presentou iniciativas tanto nas Cortes do Estado como no Parlamento de Galicia para solicitar ao Ministerio de Transportes a execución de obras de seguranza viaria na estrada N-550 ao seu paso polo concello de Vilaboa.
A proposta céntrase en resolver as dificultades de mobilidade peonil nos núcleos de Paredes, Figueirido e A Ramalleira (Bértola).
A senadora Carme da Silva, acompañada polos deputados autonómicos Luis Bará e Paulo Ríos e o voceiro local Carlos Acuña, visitou os tramos afectados para avaliar o impacto do tráfico pesado e as velocidades rexistradas nestas travesías habitadas.
Entre as medidas solicitadas figuran o calmado do tráfico, a creación de beiravías e a dotación de beirarrúas para facilitar o desprazamento a pé nunha contorna con tránsito constante de vehículos.
No ámbito das comunicacións, a formación reclama a construción do enlace de entrada e saída da autoestrada AP-9 en dirección a Vigo, unha actuación contemplada no proxecto inicial deste nó pero pendente de realización.
A iniciativa parlamentaria tamén inclúe a petición de revisar e ampliar a sinalización no punto de unión entre a N-550, a AP-9, a A-57 (Vilaboa-A Ermida) e a N-554 (Vilaboa-ponte de Rande).
O obxectivo desta demanda é organizar a circulación nas rotondas superiores e garantir unha mobilidade ordenada entre as diferentes vías de alta capacidade que conflúen no municipio.
Esta batería de medidas presentadas nas cámaras lexislativas recolle as demandas veciñais sobre a funcionalidade e a seguranza peonil dunha das estradas con maior densidade de tráfico da provincia.
Engade Pontevedra Viva como fonte preferida de Google de balde
Mantente informado coas últimas noticias de actualidade.