O sindicato CSIF reclamou o aumento do número de vixiantes de seguridade e de medios de protección nos hospitais públicos de Pontevedra e O Salnés ante o repunte das agresións a profesionais que se está rexistrado nos últimos meses.
O último incidente coñecido, lembra esta central sindical, produciuse o pasado venres en Pontevedra, cando un vixiante de seguridade de Montecelo recibiu varios golpes na cara por parte de dúas persoas, pai e fillo, na entrada de Urxencias.
"Está a aumentar a inseguridade nestes centros", advirten desde CSIF, que enumeran as continuas ameazas, insultos e agresións que recibe o persoal destes hospitais.
O sindicato entende que "hai unha falta de respecto preocupante" nos pacientes, que "non entenden que teñen que esperar ou seguir unhas normas", unha conduta ante a que os vixiantes de seguridade "non dan abasto".
Ante esta situación, a empresa adxudicataria do servizo de seguridade dos hospitais accedeu a dotar ao seu persoal de chalecos anti corte e picada, incluíndo ademais a defensa dentro as materias que inclúe a formación obrigatoria que deben prestar.
Estas medidas, segundo o CSIF, son "insuficientes", polo que esixen un reforzo de persoal para que os vixiantes "garantan a súa propia protección e a boa convivencia do centro".
Ademais, insisten en que desde que a lei de seguridade privada eliminou a condición de axentes da autoridade dos vixiantes, estes están nunha situación de "gran vulnerabilidade ante estas agresións porque as súas funcións "non están amparadas xuridicamente".
Engade Pontevedra Viva como fonte preferida de Google de balde
Mantente informado coas últimas noticias de actualidade.