O barco bateeiro Hermanos Rey, afundido o xoves preto de Porto Meloxo cunha vítima mortal, xa está na superficie.
Ao longo da mañá deste venres, buques contratados pola empresa privada Noroeste Sub procederon a reflotalo.
As tarefas estiveron supervisadas pola Capitanía Marítima de Vilagarcía e, para controlar a zona, en apoio aos buques que procederon a reflotar o bateeiro, mobilizáronse distintos medios.
Así, trasladáronse ata Meloxo embarcacións de Salvamento Marítimo, os Gardacostas de Galicia e a Garda Civil.
Estiveron na zona o Helimer 216, Salvamar Sargadelos, a patrulleira Punta Roncadoira, a auxiliar Sebastián de Ocampo e a patrulleira Cabo de Gata.
Na zona despregáronse barreiras anticontaminación e material absorbente de hidrocarburos para recoller o combustible e evitar a contaminación da ría.
O bateeiro tiña tres tripulantes. O patrón, José Rey Domínguez, de 75 anos, morreu afogado ao afundirse o barco e a súa filla e o seu xenro foron rescatados con vida.