O Colexio de Enxeñeiros de Camiños, Canles e Portos de Galicia, recoñeceu co Premio San Telmo á reforma realizada por Augas de Galicia na estación depuradora de augas residuais (EDAR) dos Praceres.
Mentres, o accésit recaeu no emisario submarino da instalación dos Praceres, que conta cunha lonxitude de 3,6 quilómetros e que incluíu o emprego dunha tecnoloxía de perforación e construción de túneles pioneira en España.
O acto de entrega destes destes galardóns, que recoñecen ás mellores obras de enxeñaría realizadas no período 2022/2023, celebrouse este xoves no Pazo da Cultura de Pontevedra e contou coa asistencia do presidente da Xunta de Galicia, Alfonso Rueda; o subdelegado do Goberno en Pontevedra, Abel Losada e o alcalde de Pontevedra, Miguel Anxo Fernández Lores, entre outras autoridades.
O titular do Goberno galego destacou a colaboración entre administracións, o labor dos "magníficos profesionais" de enxeñaría galegos, que "onde moita xente ve un obstáculo, eles ven un reto", e das empresas construtoras, con obras recoñecidas en Galicia e no exterior, que axudan tamén a "facer territorio" e construír unha Galicia de Calidade e Potente.
Rueda subliñou que a da EDAR de Praceres é unha obra moderna que dá calidade ás nosas rías, "fonte de riqueza", e que non puido ter mellor final que ser recoñecida co galardón.
O presidente galego tamén remarcou o compromiso da Xunta coas iniciativas medioambientais a través de, entre outras accións, a formación, a divulgación e a mellora da calidade das augas de Galicia.
Pola súa banda, Abel Losada lembrou que "esta infraestrutura foi financiada con fondos europeos" e destacou o papel fundamental dos enxeñeiros no desenvolvemento de infraestruturas públicas e a importancia do capital humano na economía do sector.
O subdelegado tamén fixo referencia ao complexo contexto xeopolítico actual alertando de que o retorno ao proteccionismo comercial podería xerar un incremento de prezos e dificultades na subministración de materiais, afectando tanto o sector privado como ás administracións públicas. Esta cuestión, dixo, será determinante á hora de asignar fondos públicos e garantir a rendibilidade dos investimentos para as empresas.
Engade Pontevedra Viva como fonte preferida de Google de balde
Mantente informado coas últimas noticias de actualidade.