O IES Monte dá Vila do Grove iniciaba este luns o programa 'Regueifando en Igualdade'. Trátase dunha iniciativa que promove a Subdelegación do Goberno, con motivo do 25 N, para que o alumnado utilice novas ferramentas discursivas a través da improvisación oral para afrontar situacións cotiás desde a igualdade de xénero, o respecto pola diversidade e a loita contra a violencia de xénero.
A idea tamén busca conservar a regueifa como figura propia da tradición oral galega, empregando a cantiga entre dúas persoas como modo de disputa verbal utilizando un mesmo ritmo.
Mabel Alonso, subdelegada do Goberno en funcións, acudía ao centro de estudos; acompañada por Manuela Vilaboy, xefa da Unidade contra a Violencia sobre a Muller da Subdelegación; José Cacabelos, alcalde do Grove; e Ángeles Domínguez, tenente de alcalde do municipio.
Durante as próximas semanas, máis de 250 estudantes, con idades comprendidas entre 12 e 16 anos, de tres centros educativos da provincia terán a oportunidade de participar nesta experiencia.
Lupe Blanco, regueifeira, encárgase de dirixir a actividade e, en cada sesión, o alumnado vivirá en primeira persoa a demostración dunha regueifa e terá a oportunidade de analizar a historia desta tradición artística de Galicia baseada na improvisación oral. Incidirase no papel da muller e do paso do "machismo tradicional" á "regueifa" actual.
A intención é que os estudantes aprendan a crear unha regueifa e finalicen as sesións improvisando coplas en grupo.