Nos últimos días de final de ano déronse por rematadas as melloras nos vestiarios e servizos do Estadio Municipal de San Pedro. Os catro vestiarios que se encontran situados debaixo das bancadas do estadio sufriron un radical cambio de imaxe despois de moitos anos, con melloras nas distintas zonas de duchas e urinarios, ademais do pintado de toda a instalación.
A zona central, zona de árbitros e zona de enfermaría tamén se uniron ás melloras proxectadas.
Os baños para o público que presentaban tamén unha imaxe obsoleta tamén foron reformados. O Concello tamén aproveitou para adaptar un dos baños públicos para persoas con discapacidade, cubrindo unha gran carencia deste recinto deportivo.
Tras as melloras coa pista de parqué do colexio Sequelo, os vestiarios e cambio de imaxe do Pavillón da Cañota e as novas funcionalidades no Pavillón da Raña, os vestiarios e baños do Estadio Municipal foron o último chanzo nesta fase de melloras das instalacións deportivas municipais.
Nos próximos días, o Campo de Fútbol de Santomé, co seu novo céspede de herba sintética, será outra realidade.