Salvamento Marítimo remolcou ata o porto ao pesqueiro Ariño, con base no Grove, que sufriu unha vía de auga cando se atopaba preto de Corrubedo.
O suceso rexistrouse sobre as oito da mañá. Foi o propio pesqueiro o que realizou unha chamada de alerta tras descubrir que entraba auga no barco.
O centro de coordinación de salvamento con base en Fisterra mobilizou ata o lugar no que se atopaba o Ariño á embarcación de intervención rápida Salvamar Régulus e ao helicóptero Pesca I dos gardacostas de Galicia.
Tras comprobar que os seus tres tripulantes estaban a salvo, os efectivos de emerxencias axudaron a controlar a vía con bombas de achique.
Unha vez taponada a entrada de auga, o pesqueiro foi remolcado ata o porto de Aguiño, en Ribeira.