Xa hai data definitiva para iniciar as obras de renaturalización do río Gafos. Tras resolver os trámites administrativos pendentes, os traballos comezarán o vindeiro luns 18 de maio, segundo avanzou o alcalde de Pontevedra.
De cara ao comezo desta intervención, a UTE formada polas empresas pontevedresas COVSA e EC Casas aprobaron o calendario de obras que, se cumpre as previsións, permitirá que o Gafos estree o seu novo aspecto en maio do ano que vén.
Así, a partir do luns, indicou Miguel Anxo Fernández Lores, sinalizarase todo o ámbito de intervención, organizaranse os accesos, realizarase a provisión de material e empezaranse os traballos coas novas redes de saneamento.
Este plan de obras fixa que esta actuación comezará por Alcalde Hevia, na zona máis próxima á escola infantil, e progresivamente irá avanzando cara a Xeneral Rubín.
A escola terá un novo acceso directo desde Alcalde Hevia e, en todo momento, os traballos respectarán as clases e as horas de descanso dos nenos.
A partir de xullo, aproveitando que xa non é período lectivo, rexistrarase un dos fitos deste proxecto, a demolición do paseo de formigón e de todos os elementos construídos no seu día para soterrar a canle do río.
Será, por tanto, o momento no que o Gafos volverá ser visible en todo este tramo, actuación que se completará coa escavación do novo trazado do río e coa execución de muros, drenaxes e proteccións hidráulicas.
O plan opta por facelo nestes meses, ademais, para aproveitar a época na que non se prevén grandes choivas que puidesen provocar inundacións na zona.
Na seguinte fase dos traballos, entre outubro e xaneiro de 2027, executaranse todas as redes de abastecemento, as canalizacións eléctricas e de telecomunicacións ou a nova iluminación pública e arrancará a urbanización do parque.
Entre xaneiro e marzo, pola súa banda, as obras centraranse en habilitar os pavimentos finais, as pasarelas peonís e varandas e todas as áreas infantís.
COVSA e EC Casas dedicarán os meses finais, até o 17 de maio -data prevista para a finalización das obras- á xardinaría e acabados finais, á instalación do mobiliario urbano e á limpeza xeral para a súa inauguración.
Engade Pontevedra Viva como fonte preferida de Google de balde
Mantente informado coas últimas noticias de actualidade.